E-mail: Ulkerismail2002@yahoo.com

ناشر: ياز نشرياتي

تيراژ: 2000

چاپ: اورمو

چاپ نوبتي و تاريخي: بيرينجي چاپ ـ یای 1386

اورميه، خيابان مدني1 ـ كوي16 ـ پلاك 103 انتشارات ياز،تلفاكس:2764295-0441

35 لر...

بو گئجه

اوتوز بئش باشام

اوتوز بئش جوت گؤز

اوتوز بئش كؤنول

اوتوز بئش ياش!...

اون، اييرمى

اوتوز دئييلم آرتيق!

اوتوز بئش بشرم

35 ارم

35 ار.

-

آى ايشيغييلا قورتاريب

آينايلا باشلايان بو گئجه بيتينجه،

اوشاقليغا داير آغريلار

آهلار

گؤز ياشلاريم دا تمام

اوتوز بئشر - اوتوز بئشر!

سلام حيات!

گون آيدين ياشام!

داغينى داشيماقدا

داشينى قيرماقدا

او قدر اوستالاشميشام

او قدر اوستالاشميشام...

آياغيمى، اليمى اؤپه­سيم گلير!

هووور- هووور سئوگى­يم

هاوار- هاوار سئودا

آتشلر

عطشلر ايچيندن سسيم گلير...

قولاق آسيرسينيزمى اوره­ييمين سسينه؟

ياشاييرام قيرپيم - قيرپيم ياشامى

- شوخلوغوم يوخدور!-

ائنينه- بويونا

ثانيه­سى- ثانيه­سينه!

گئديرم

يوللارى يئللره مينديره - مينديره...

گئديرم

دونيالارى قاپى - قاپى

دينديره - دينديره...

اؤلومو ترك ائديرم

زامانى - مكانى ايچيمه

سينديره- سينديره...

-

قلبيمين هر آتيشينين باشقا آدى،

كيرپيييمين هر ياتيشينين

قولاغيمداكى هر سس،

جييريمده­كى هر نفسين

باشقا دادى...

--

- و سن!

اوجا باشلارى ايه­ن

ايگيد جانينا قييان

دؤش داغلاماق اوچون اللرى اسن

پييان دونيا!

بولودون چاخماغينى چاخسين

ايلديريمين ياخاجاغينى ياخسين

اؤلومون چاغيرسين

چاغيراجاغينى!

"عبد" ائده بيلمه­دين

منى قولاى - قولاى قول قيلا بيلمزسن!

قينلا قينلاناجاغينى.

اوجا سسين آستاسى

اوزون سؤزون قيسساسى:

كسرى يوخ منه كسدييين كسيملرين

دلى - دولو بير شاعيرله­سن طرف؛

اللرينى آرخادان باغلاداجايام!

ناغيلينا - نوغولونا اویان

دئييل بو اوغول

عاشيقلرى آغلار قويان فلك !

آنانى آغلاداجايام اولان سنين!

آنانى آغلاداجايام.

نئيسان

سن

هر زامان

"سودان گلن كوزه­لى قيز"سان.

هر زامان گونش باجيسى

- گئجه­ده آچيلان آى باجاسى -

سن

هر فصیل يازسان

باهارين ايكينجى آييسان

سن.

مكتوب

بيز

 گئجه دئييليك

گئجه­ده­ييك!

"سن" له "من"

گئجه دئييليك،

گئجه كيمى

ايكى هئجه­ييك.[1]

قو قوشلارى اوزوشَرَك ووقاريميزدا

باتماق، بيتمك بيلمه­ين

ايكى قومرولو حنجره­ييك.

گؤزوموزو گؤينتمه­سين قارانليق!

بيز

قارشى - قارشييا آچيلان

ايكى سؤنمه­ين پنجره­ييك.